Izabranici Slobodana Draškovića zasluženo su slavili i tako na lijep način "otvorili“ novu tribinu na Trening kampu FSCG.
Naša selekcija odigrala je dobro prvo poluvrijeme, nakon kojeg je zasluženo vodila. Mrežu gostiju zatresao je Marko Bojović u 30. minutu, koji se dobro snašao poslije slobodnog udarca Rastka Marsenića, a onda sa desetak metara iskosa šutirao i matirao Simona Simonija.
Osim toga, dobar pokušaj sa oko 25 metara imao je Arnel Kujović u 21. minutu.
U nastavku je viđena još bolja igra "sokola“. Nakon samo par minuta igre u drugom poluvremenu, Bojović je imao šansu, ali je šutirao preko gola nakon greške gostujućeg golmana.
U 66. minutu Nemanja Popović je ubacio loptu za Vuka Strikovića, koji je sa nekoliko metara iskosa šutirao pravo u golmana. Dva minuta kasnije Crna Gora je ipak stigla do novog gola. Aldin Drndar je odlično prošao po lijevoj strani, zatim dao loptu za Vlada Gajića koji takvu šansu nije propustio.
Isti rivali revanš meč odigraće 15. juna, na stadionu ,,Ljoro Borići“ u Skadru.
