Izuzetno neizvjestan meč donio je trijumf “ajkula”. Naši su u prvom poluvremenu igrali odlično sa igračem više i to je donijelo razliku. 1:1 je bilo poslije prve četvrtine, a onda je ekipa Vladimira Gojkovića dala tri gola iz četiri pokušaja sa igračem više u drugoj četvrtini i na odmoru je mala dva gola viška 5:3.
Uslijedio je pad. Loša odbrana i nekoliko ishitrenih napada što je Rusija iskoristila da se u trećoj četvrtini potpuno vrati, poravna na 7:7 i dođe do napada za vođstvo sa igračem više, ali Šćepanović nije dao.
Posljednja četvrtina bila je rezervisana za naše iskusnije vateroliste. Draško Brguljan je prednjačio. Dao je gol za 8:7, poravnao je Merkulov, ali je posljednja riječ bila Aleksandra Radovića.
Rusi su na minut prije kraja dobili igrača više, ali im je Draško Brguljan odmah ukrao loptu. Isti igrač je i u našem posljednjem napadu uzeo loptu nakon što je izblokiran šut Radovića i tako smo osigurali trijumf.
Brguljan je meč završio sa četiri gola, Radović je dodao tri. Upisali su se još Mišić i Banićević. Na kraju smo dali samo četiri gola sa igračem više, a u čitavom drugom poluvremenu samo jedan.
Rival za peto mjesto biće pobjednik meča Italija – Australija.
Izvor: CdM
