Dragan Drašković i Vladan Spaić osvrnuli su se na poraz od Hrvatske i najavili novi okršaj sa Mađarima, treći ovog ljeta.
"Izgubili smo utakmicu koju smo vodili gotovo cijelo vrijeme. Ko je gledao, vidio je da smo bili mnogo bolji od Hrvatske. Ali, u sportu ne pobijedi uvijek bolji. Ostaje veliki žal, zaslužili smo pobjedu, ali nema nazad, moramo da idemo dalje. Ostala su nam još dva meča i moramo ih odigrati kako treba. Slijedi Mađari, ekipa koja je odigrala loše takmičenje. Dva puta smo ljetos igrali sa njima, i dobili smo ih oba puta. Nadam se da ćemo se izdići iz svega ovoga, pobijediti Mađare i boriti se za peto mjesto", kazao je Drašković.
Spaić ističe da su odigrali odličan meč protiv Hrvata, da ostaje veliki žal, ali da sada moraju da se okrenu narednim utakmicama.
"Mađari su odlična ekipa, pokazali su to u Svjetskoj ligi, ovdje ih je Srbija dobila suviše lako, po meni. Sigurno da će biti težak meč i ostaje nam da se borimo za peto mjesto što nije mala stvar", poručio je Spaić.
Današnji meč igra se od 16.45h.
