Grivić i naredne sezone kraj Bistrice: Bitno je da zadržimo timski duh

Iza Sutjeske je sezona u kojoj je izgubljena titula, a zbog prekida takmičenja “plavi” nisu imali šansu da se bore za pehar u Kupu. Sada su se već okrenuli pripremama za novu sezonu, u kojoj će ih voditi Dragan Radojičić, gdje će pokušati da se domognu trofeja na oba fronta, a slijede i novi izazovi u evropskim takmičenjima.

“Drago mi je što ću i narednu sezonu provesti kraj Bistrice. Nažalost , prethodna se završila kako se završila, gdje smo imali šansu da popravimo učinak osvajanjem kupa, ali nažalost sve je moralo biti prekinuto. Šta je tu je, izborili smo plasman u klavifikacije za Evropu. Početak naredne sezone je blizu, a na nama je da se što bolje spremimo, kako za prvenstvene, tako i za evropske utakmice”, navodi Grivić u razgovoru za naš portal.

Grivić je igrama naročito u drugom dijelu sezone pokazao da se na njega i dalje može i te kako računati, ali on ističe da je timski duh ono što je krasilo igru Sutjesku posljednjih godina.

“Što se tiče lično mog učinka, bilo je naravno i dobrih i loših partija, a sve je diktirala igra cijele ekipe. Kada je ekipa pružala dobre partije to je bila zasluga svih igrača, a tako je bilo i kada bi podbacili. Kod nas se nikada nije isticao jedan igrač ispred svih i uvijek je timski duh bio prioritet. Bitno je da takav pristup zadržimo i to će donijeti sigurno rezultate u narednoj sezoni”, naveo je on.