Radović: Ovakav poraz nas neće poremetiti; Ataman: Nismo zaslužili pobjedu, Dubljević nas je “ubio”

“Osjećam se prilično razočarano, ne zbog poraza, nego zbog toga kako smo poraženi. Bolje je da ćutim. Igrali smo dobru utakmicu, hrabro, disciplinovano. Tri minuta na kraju 2. četvrtine nismo imali fokus, ponajviše u odbrani, što je Turska iskoristila da ode na plus 10. Drugo poluvrijeme smo odigrali odlično, stigli, poveli, a imali smo tri šuta za pobjedu i nismo ih ubacili. Žao mi je što nismo otvorili turnir pobjedom protiv odlične ekipe“, rekao je Radović.

Selektor je poručio da ovakav poraz neće poremetiti ekipu.

“Osim Vučeljića, koji ima 19 godina, imamo puno iskusnih igrača, koji su nastupali na ovakvim prvenstvima i igraju u svojim klubovima zapažene role. Mislim da smo dovoljno iskusni da nas ovo ne poremeti. Možda je dobro što je sjutra slobodan dan, da “izduvamo” glave i naredne utakmice odigramo sa istim motivom i energijom kao i ovu“, kazao je Radović.

Selektor Turske Ergin Ataman kazao je da njegova ekipa nije zaslužila pobjedu protiv Crne Gore.

“Nismo zaslužili da pobijedimo utakmicu. Jedina pozitivna stvar je što smo počeli prvenstvo trijumfom. Izuzev 2. četvrtine, igrali smo užasnu košarku. Ne računajući Larkina i Mahmutoglua, imali smo samo jedan pogodak iz 19 pokušaja za tri. Visoki igrači su bili užasni, Dubljević nas je “ubio”. Ne znam da li posljednja odluka ispravna, moram da provjerim na snimku, ali je bila vrlo diskutabilna situacija“, iskren je bio Ataman.

Turska je savladala našu selekciju na startu Eurobasketa (72:68)

Crna Gora će prolaz u osminu finala tražiti u duelima protiv Belgije i Bugarske.

“Protiv Turske smo odigrali odličnu utakmicu defanzivno i ofanzivno. Ako budemo tako igrali naredne dvije, bićemo na dobrom putu da izborimo plasman u osminu finala“, poručio je Radović.