Mještani Gornjih Brezana pronašli ruksak sa novcem i dokumentima i vratili ga vlasnici

Tamara se sa sestrom i djecom iz Beograda zaputila na ljetovanje u svoj rodni grad.

“Zaista sam zahvalna ovim ljudima. Mali je procenat onih koji bi ovako postupili. U ruksaku su nam bila sva dokumenta i novac za ljetovanje. Da nam ga nisu vratili mogli smo samo da se odmah vratimo za Beograd, i da budemo srećni što imamo povratne karte”, kazala je Tamara nakon što je dobila nazad ruksak.

Goran i Mićo boravili su jutros u Etno-selu “Izlazak” u Pivi, gdje je bila i Tamara.

“Krenuli su da idu, ušli u automobil, a mi smo komentarisali da im je gepek ostao otvoren. Ispostavilo se da je dijete zaboravilo da ga zatvori i da im je ruksak ispao dok su vozili. IKrenuli smo put Brezana oko pola sata poslije njih i na putu smo vidjeli ruksak. U njemu su bila sva dokumenta, prilična suma novca i telefon koji je bio ugašen. Kada smo stigli u Brezna, stavili smo telefon na punjač i on je pozvonio, a sa druge strane je bila Tamara”, pričaju Goran i Mićo.

Objasnili su Tamari gdje se nalaze i rekli joj da može da dođe po svoj ruksak.

Tamara nije krila oduševljenje, a Mićo i Goran skromno dodaju da bi to svako uradio.