UBNOR i antifašisti Nikšića obilježili 144. godišnjicu bitke na Vučjem Dolu

Na spomenik, su delegacije UBNOR-a i antifašista Nikšića  i udruženja „Vučedolac“ koje su činili Slobodan Bato Mirjačić, dr Jasmina Nikčević, Čedo Vuković, Savo Šekarić i Veliša Šupić položile cvijeće.

“Bila je ovo prilika da se podsjetimo jedne od najslavnijih bitaka iz naše prošlosti, bitke koja se po značaju može mjeriti samo sa onom sa Grahovca. Istina, Crnogorci su tokom Veljeg rata‚ 1876-1878. protiv Turaka izvojevali još šest velikih i 27 manjih pobjeda, ali ova bitka bila je prekretnica i utrla je put priznanju crnogorske nezavisnosti na Berlinskom kongresu 1878. godine. Crnogorska pobjeda na Vučijem Dolu nad daleko nadmoćnijom turskom vojskom  odjeknula je Evropom”, piše u saopštenju UBNOR-a i antifašista Nikšić.

O velikoj pobjedi, kako su kazali, pisali su konzuli evropskih dvorova i skretali pažnju evropskoj diplomatiji na malu, ali nepokornu Crnu Goru.

“Da je bitka zaista bila teška, pokazuje i veliki broj poginulih istaknutih turskih starješina kao: Selim-paša, Ali-beg Rizvanbegović, Derviš aga Ljutović, Hadži Muri Bej, komandant carske garde, mostarski muftija,  i 168 nižih oficira. Rane su zadobili, Muhtar-paša i Mustaj paša, a zarobljen je Osman paša i 300 nizama. Zaplijenjeno je 5 brdskih topova, oko 3.000 pušaka, veliki broj sabalja i drugog ratnog materijala. Crnogorci su imali 72 poginula, tri teško ranjena koji su umrli od rana, i 118 lakše ranjenih”, piše u saopštenju, dodajući da je ova bitka ostavila neizbrisiv trag, ne samo u našoj istoriji već i tradiciji. 

“Bitka na Vučijem Dolu, jedan je od najslavnijih događaja iz naše istorije i današnje podsjećanje samo je dokaz da ne zaboravljamo žrtve koje su date za oslobođenje naše zemlje i koje su svojim podvizima doprinijele da budemo priznati kao 27 nezavisna država Evrope”, zaključuju borci i antifašisti Nikšića.