ABA 2 liga: Oslabljena Sutjeska gostuje ekipi Sparsa

Nikšićani na ovaj duel idu bez možda svoja dva najbolja igrača, povrijeđenih Nikole Pavlićevića i Radosava Spasojevića, što će umnogome otežati posao timu Zorana Glomazića koji još uvijek ima šansu da se plasira u plej of.

“Gostujemo odličnoj ekipi koja je popunjena na svim pozicijama. Sa druge strane mi smo mnogo oslabljeni, jer su u finalu Kupa Crne Gore povrijeđeni Radosav Spasojević i Nikola Pavlićević. Nadam se da ćemo se u izmjenjenom sastavu kvalitetno suprostaviti Sparsima i u dobrom svijetlu predstaviti sarajevskoj publici”, kazao je trener Nikšićana Zoran Glomazić.

Igrač Sutjeske, Petar Raičković ističe da će Sutjeska u glavnom gradu Bosne i Hercegovine, iako oslabljena, dati sve od sebe da ostvari pozitivan rezultat.

“Raspoloženje  i optimizam u ekipi su na zavidnom nivou, čemu je sigurno doprinio uspjeh u nacionalnom Kupu, gdje smo plasmanom u finale i korektnom igrom protiv Budućnosti postigli značajan uspjeh. U Sarajevo idemo da pružimo svoj maksimum i pokušamo da iznenadimo domaćina”, istakao je Raičković pred put u Sarajevo.

Duel između Sparsa i Sutjeske igra se u dvorani Novo Sarajevo od 18h.