Nikšićko pozorište: Film „Bitka na Neretvi“

Bitka na Neretvi je jugoslovenski partizanski film iz 1969. godine. Scenario su napisali Stevan i Veljko Bulajić, a režirao ga je Veljko Bulajić. Film je zasnovan na istinitim događajima iz Drugog svjetskog rata, koji se odnose na strateški plan udruženog napada sila Osovine na jugoslovenske partizane 1943. godine.

Ovaj film kritika često smatra najboljim i najskupljim filmom socijalističke Jugoslavije. Nominovan je za Oskara 1969. u kategoriji za najbolji strani film.

Početkom 1943. godine njemački generali su počeli, po Hitlerovom ličnom naređenju, sprovođenje plana „Vajs“, koji je previđao uništenje partizanskih jedinica u zapadnoj Hercegovini. Pritisnuti nadmoćnijim neprijateljem, partizani, sa Vrhovnim štabom i 4.500 ranjenika i tifusara, našli su se opkoljeni u dolini Neretve. Šansa za spas je bio prelazak jedinog nesrušenog mosta, na čijoj drugoj strani su takođe bile raspoređene jake neprijateljske snage. Tito je naredio da se i taj most sruši, što je  iznenadilo neprijatelja, koji je predviđao da će partizani pokušati samoubilački proboj obruča. Ali, u toku samo jedne noći partizani su izgradili privremeni most pored srušenog i uspjeli da se prebacena drugu stranu, gdje dolazi do sukoba sa četnicima…

Glavne uloge: Sergej Bondarčuk, Jul Briner, Entoni Doson, Milena Dravić, Boris Dvornik, Kurt Jirgens, Silva Košćina, Hardi Kriger, Franko Nero, Hauard Ros, Lojze Rozman, Ljubiša Samardžić, Oleg Vidov, Orson Vels, Velimir Bata Živojinović, Pavle Vujisić.

Projekcija je u organizaciji Crnogorske kinoteke i Nikšićkog pozorišta, a u okviru Programa podrške razvoju kulture u Nikšiću za 2016. godinu. 

Ulaz za ovu projekciju je slobodan.